أقر و أعترف أنا الموقعة أدناه بكامل إرادتي و قواي العقلية إني مدلعة، و مرفهة و مش مقدرة مجهودك و تعبك معايا أنا و العيال.
يا مستتني و مريحني و مهنينى.
ماهو إحنا كده يا ستات ما بيطمرش فينا و ما بنقدرش قيمة النعمة اللي إحنا فيها
عشان كدة أنا فكرت إزاي أريحك و أعوضك عن الشقى اللي أنت شايفه معانا مالقيتش غير إني أبدل معاك الأدوار و أشيل بدالك المسئوليات. ماهو من حقك تشوفلك يومين دلع حلوين إنت كمان.
أنا هروح الشغل كل يوم أشقى و أتعب علشانكم. و هصرف على البيت و أنت بقى كل اللي عليك أنك تستريح و تتبغدد. بس ما تنساش يا حبيبى شوية حاجات صغيرة أنا كنت بعملها.
يعني مثلا تصحى من النوم قبل زقزقة العصافير تكوي هدوم المدارس للعيال و تصحيهم و تشطفهم و تفطرهم و تلبسهم و تحضرلهم السنداوتشات و تنزلهم يركبوا الأتوبيس.
- بعد كده تيجي تصحيني و تحضرلي الحمام و الفطار و طبعا عقبال ما أخلص تكون حضرت لي هدومي عشان أروح الشغل حاكم أنا هشقى و أتعب علشانكم.
-تنزل يا حبيبي في عز الظهر على السوق جيب الغدا و اقف في طابور العيش و طير على البيت عشان تلحق تنضف الخضار و تحضر الرز و السلطة و تسيب الأكل يستوي عقبال ما تحمي العيال.
أصلي ماحبش أي أكل بايت. زي واحد صاحبنا .
بعد الغدا أنا هدخل أريح شوية و أنت بقى أدخل على المطبخ إغسل الأطباق و إكنس الأرض و حط الغسيل في الغسالة حاكم الحاجات دي ما تستناش .
خلاص يا حبيبي هانت. فاضل بس تذاكر للعيال و تعمل معاهم الواجبات . بس لو حد فيهم جاب نمرة وحشة هزعل منك و ده يبقى أسمه اهمال . أنا هقوم بعد كده أنزل أعمل كام مشوار مش مفهومين. واخدلى بالك
المهم أي حجة علشان أسيب البيت و أنزل أشرب لي كابيتشينو في أي كوفي شوب مع صاحباتي .. و أ رجع البيت بالليل ألاقيك حضرت كيكة ولا أي حاجة حلوة أكلها مع العشا بعد ما تكون عشيت العيال و نيمتهم و نشرت الغسيل اللي هتلمه بكرةقبل ما ارجع من الشغل و تقف ثلاث ساعات على رجلك تكويه علشان المكوجية أصبحوا مفتريين بس خلي بالك يا حياتي من كسرة رجل البنطلون أصلها تفرق معايا جدا.
أنا هنزل يا حبيبي أزور ماما بعد الغدا. أصلي ما بعديش عليها إلا كل أسبوع مرة و دي ست الحبايب زي ما أنت عارف. أنت بقى فاضي على طول. ممكن تعدي على والدتك أي وقت. ما أنت هتبقى مدلع و متهني و طبعا
المهم في ده كله أن كل يوم ألاقيك واخد دُش و متأنتك و حالق دقنك " " و حاطت برفان يفتح النفس و لابس البيجامة الحرير الزرقا و مستنيني بإبتسامة حلوة سعيدة و أنا راجعة بالليل.
إمضاء
زوجتك المستريحة المستهنية المستستته
ههههههههههههههههههههههههههه
الرئيسية 
