موضوع: مش عارفة تنامي من برد رجليكي .. تعالي أقوللك .. الإثنين فبراير 20, 2012 2:08 pm
السلام عليكم ورحمة الله وبركاته
طبعا معظمنا بييجي وقت النوم وهيموت ينام ويهرب من البرد الفظيع دا ..
لكن أول ما الواحد بيدخل تحت البطانية بيكتشف إن جاب معاه فريزر تحت البطانية أقصد طبعا رجليكي
وثبت علميا إن الواحد صعب يستغرق في النوم وقدمه تشعر بالبرد .. والنتيجة طبعا إننا نلبس شراب على شراب ويمكن على شراب تالت كمان .. وياريته بينفع .. لحد ما ربنا يباركلها يا رب حماتي أنقذتني بأحلى نصيحة
عارفين السر الحقيقي فين ؟!!!!!
إزازة بلاستيك نظيفة
أي نعم
هاتي أي إزازة بلاستيك نظيفة وامليها مية سخنة شويتين .. لكن إوعي تكون مغلية علشان ماتسيحش الإزازة أنا بصراحة بخليها سخنة أوي وبتبخر كمان من السخان وطبعا إمسكي الإزازة بأي فوطة علشان السخونية متلسعكيش .. بعد كدة اقفليها كويس أوي واتأكدي إنها مش بتسرب ولا نقطة ونشفيها كويس أوي من برة بدل ما تتفتح على السرير وشوفي بقى هتقولي إيه لأهلك .. دا لو حد صدقك من أصله
بس بقى يا ستي وحطيها تحت رجليكي واحضنيها كدة ما بين رجليكي وادلع يا جميل ..
نصيحة مهمة جدا :
ما تلبسيش أكتر من شراب واحد لأنه لو أكتر مش هتحسي بدفاها .. ومتخافيش لأنها مش هتلسعك لأن برودة رجليكي أكتر بكتير من سخونيتها .. ودعواتي بنوم جميل دافئ وأحلام سعيدة لكل القمرات
الرئيسية 
